Aktorja amerikane Daveigh Chase, e njohur për rolin e frikshëm të Samara Morgan në filmin horror “The Ring” dhe si zëri i Lilo-s në filmin e animuar “Lilo & Stitch”, ka ndërruar jetë në moshën 35-vjeçare.
Sipas partnerit të saj, Roy Hernandez, Chase u nda nga jeta të martën si pasojë e meningjitit dhe një infeksioni të rëndë në gjak, që shkaktoi komplikacione septike dhe dështim të organeve. Lajmi u raportua fillimisht nga TMZ. Më herët gjatë këtij muaji, aktorja ishte shtruar në një spital në Los Angeles për shkak të kequshqyerjes.
Daveigh Chase u bë e famshme në vitin 2002, kur i dha zërin personazhit të Lilo-s në filmin e Disney-t “Lilo & Stitch”, rol që e ripërsëriti edhe në serialin televiziv të franshizës. Po atë vit, ajo interpretoi Samara Morgan në “The Ring”, rol për të cilin fitoi çmimin MTV Movie Award si “Villania më e mirë”.
Karriera e saj përfshin edhe role në filma dhe seriale të njohura si “Spirited Away”, ku zëri i saj u dëgjua në versionin anglisht të Chihiro Ogino, “Donnie Darko”, “Big Love”, “ER”, “Sabrina the Teenage Witch”, “Beethoven’s 5th” dhe “Mercy”.
Pak para ndarjes së saj nga jeta, partneri Roy Hernandez kishte hapur një fushatë në GoFundMe për të mbuluar shpenzimet e kujdesit të saj. Në përshkrimin e saj ai tregonte se Chase kishte kaluar një fëmijëri të vështirë, ishte larguar nga familja dhe kishte përjetuar bullizëm e periudha të vështira në jetën personale.
