Kryeministri Edi Rama po përpiqet të paraqesë si të parëndësishme rezolutën e Parlamentit Europian për zonat e mbrojtura, duke pretenduar se eurodeputetët nuk kanë folur për Zvërnecin dhe se protestuesit po festojnë një fitore që nuk ekziston.
“Amendamenti i ‘fitores’ u rrëzua, ndërsa amendamenti i miratuar nuk ka asnjë lidhje me Zvërnecin, pra me peizazhin e mbrojtur Pishë Poro–Nartë, po shprehimisht me zonën e mbrojtur Nartë–Vjosë”, shkruan Rama në një reagim të fundit në rrjetet sociale.
Por argumenti i kryeministrit duket se shmang thelbin e rezolutës së Parlamentit Europian.
Eurodeputetët nuk kërkuan thjesht mbrojtjen e një zone të caktuar. Ata kërkuan një moratorium të menjëhershëm për ndërhyrjet në zonat e mbrojtura dhe shfuqizimin e dispozitave problematike të ndryshimeve të vitit 2024 në ligjin për zonat e mbrojtura, pikërisht ligji që u kundërshtua nga ambientalistët dhe që hapi rrugën për zhvillime turistike në territore të mbrojtura.
Madje, vetë Rama pranon në reagimin e tij se ligji do të rishikohet.
“Ndërsa lidhur me rishikimin e ndryshimeve në ligjin për zonat e mbrojtura, europarlamentarët do të informohen se ai është pjesë e agjendës së negociatave dhe si i tillë do të jetë fillimisht në një proces analitik me Komisionin, ku do të identifikojmë çdo pikë që nuk përputhet me kriteret e standardet e BE-së”, shkruan ai.
Pra, nga njëra anë kryeministri thotë se rezoluta nuk përbën fitore për protestuesit, por nga ana tjetër pranon se ligji që ata kundërshtojnë do të rishikohet për shkak të problemeve të evidentuara nga Bashkimi Europian.
Po ashtu, Rama përpiqet ta reduktojë debatin në një çështje terminologjie mes “Pishë Poro–Nartë” dhe “Nartë–Vjosë”, ndërkohë që rezoluta e Parlamentit Europian trajton më gjerë mbrojtjen e zonave të mbrojtura, ligjin e vitit 2024 dhe ndikimin e projekteve strategjike në mjedis.
Në këtë kuptim, argumenti i kryeministrit nuk rrëzon shqetësimin e ngritur nga Brukseli, por përpiqet ta zhvendosë debatin nga përmbajtja e rezolutës tek emërtimi i zonave.
Kjo është arsyeja pse opozitarët dhe ambientalistët e konsiderojnë reagimin e Ramës një përpjekje për të relativizuar mesazhin politik të Parlamentit Europian, i cili për herë të parë kërkoi publikisht moratorium për ndërhyrjet në zonat e mbrojtura dhe rishikimin e ligjit që qeveria e ndryshoi në vitin 2024. ©Lapsi.al
