Harry Styles ka reaguar ndaj kritikave që kanë shoqëruar koncertet e tij të fundit në Amsterdam, pasi disa fansa u ankuan për pamjen e kufizuar gjatë performancave.
Ish-anëtari i One Direction po mban aktualisht turneun “Together, Together” në “Johan Cruyff Arena”, ku do të zhvillojë 10 koncerte. Megjithatë, një pjesë e publikut nuk mbeti e kënaqur me skenografinë e zgjedhur për shfaqjen.
Disa fansa e cilësuan organizimin si “një nga më të dobëtit”, duke u ankuar se strukturat e larta dhe korridoret rreth skenës ua pengonin pamjen drejt artistit gjatë koncertit.
Gjatë një prej performancave, Harry Styles vendosi të shpjegojë arsyen e këtij koncepti skenik.
“Arsyeja pse e ndërtuam skenën në këtë mënyrë është sepse doja të isha sa më afër jush. Ky turne ka të bëjë me të qenit bashkë, me argëtimin dhe ndarjen e momenteve së bashku,” u shpreh këngëtari para fansave.
Pavarësisht kritikave, shumë të tjerë vlerësuan performancën dhe energjinë e artistit në skenë, ndërsa media britanike “The Guardian” e vlerësoi koncertin me katër yje.
Pas koncerteve në Amsterdam, Harry Styles do të vazhdojë turneun me 12 net në stadiumin “Wembley” në Londër.
