Katër kërcënime për bomba në avionë pasagjerësh janë regjistruar të martën, më 3 nëntor, në zona të ndryshme të Europës, duke vënë në lëvizje autoritetet dhe shkaktuar ndryshime në programin e fluturimeve.
Incidentet u shënuan në Poloni, Spanjë dhe Bullgari, ndërsa avionët e përfshirë kishin nisur fluturimet nga Londra, Kopenhaga, Mançesteri dhe Izraeli. Sipas BBC-së, dy nga katër kërcënimet kishin të bënin me fluturime drejt Varshavës.
Në rastin e parë, një avion me 181 persona në bord, i cili ishte nisur nga aeroporti Heathrow i Londrës drejt aeroportit “Shopen” në Varshavë, kreu një ulje emergjente në aeroportin Varshavë-Modlin. Pas uljes, avioni iu nënshtrua kontrolleve nga specialistët.
Fluturimi i dytë ishte nisur nga Kopenhaga dhe kishte gjithashtu si destinacion aeroportin “Shopen” në Varshavë. Sipas mediave daneze, pavarësisht kërcënimit për bombë, avioni u ul normalisht.
Në Spanjë, një avion i kompanisë Ryanair, i nisur nga Mançesteri, u detyrua të ulej në aeroportin e Murcias pas një kërcënimi të ngjashëm.
Sipas Francisco Lucas, përfaqësues i qeverisë spanjolle në rajonin e Murcias, në avion ndodheshin gjithsej 121 persona, përfshirë edhe anëtarët e ekuipazhit.
Incidenti i katërt u regjistrua në Bullgari, ku një avion që kryente një fluturim nga Izraeli u ul në Sofje pas një kërcënimi për bombë të dërguar përmes postës elektronike. Sipas mediave lokale, kërcënimi rezultoi në fund një alarm i rremë.
Katër incidentet u regjistruan vetëm një ditë pas uljes së detyruar të një fluturimi të kompanisë Wizz Air, i nisur nga aeroporti Luton i Londrës drejt Budapestit, gjithashtu për shkak të një kërcënimi për bombë.
Avioni ishte shoqëruar drejt kryeqytetit hungarez nga një avion luftarak i Hungarisë.
