Regjisori i videoklipeve Chris Applebaum ka zbuluar një detaj të panjohur nga ndarja e Britney Spears dhe Justin Timberlake, duke rrëfyer se këngëtarja mori mesazhin e ndarjes pikërisht gjatë xhirimeve të videoklipit "Overprotected"në vitin 2002.
Në podcastin "Hyperfixated with Joseph Shepherd", Applebaum tregoi se Spears u mbyll në rimorkion e saj dhe refuzonte të dilte për të vazhduar xhirimet.
Kur shkoi ta takonte, ai zbuloi se artistja sapo kishte marrë një mesazh nga Timberlake, ku ai i jepte fund lidhjes së tyre.
Sipas Applebaum, ai i tha Britney se, në vend që të largohej, mund ta kthente dhimbjen në motivim.
"Dil dhe bëj një performancë aq të jashtëzakonshme, sa t'i tregosh se sapo humbi gjënë më të mirë që kishte," kujtoi ai se i kishte thënë këngëtares.
Regjisori tha se këto fjalë e motivuan Spears, e cila u rikthye në xhirime dhe realizoi një nga performancat më të vlerësuara të karrierës së saj.
Në autobiografinë "The Woman in Me", të publikuar në vitin 2023, Britney Spears konfirmoi se Justin Timberlake i dha fund lidhjes së tyre trevjeçare përmes një mesazhi të shkurtër me vetëm dy fjalë: "It's over" ("Ka marrë fund").
