Bella Thorne ka folur për fillimet e saj në famë dhe marrëdhënien me Zendaya gjatë kohës kur të dyja luanin në serialin e Disney Channel, “Shake It Up”.
Aktorja 28-vjeçare ishte e ftuar në podcastin “Call Her Daddy” të mërkurën, ku foli për karrierën e saj pas periudhës në Disney, përgjegjësinë që kishte marrë përsipër për familjen që në moshë të re dhe mënyrën se si industria e argëtimit ka ndikuar në marrëdhëniet e saj personale.
Thorne interpretoi personazhin CeCe Jones në “Shake It Up” nga viti 2010 deri në 2013, përkrah Zendaya-s, e cila luante rolin e Rocky Blue.
“Me gratë është gjithmonë sikur: ‘Duhet t’ju bëjmë të luftoni për një vend… nëse mund ta rrëzoni njëra-tjetrën dhe të luftoni aq sa ne kërkojmë nga ju të dyja, ndërkohë që ka kaq shumë vende për burra, por për gratë thuhet se ka vetëm për një prej jush’”, tha Thorne gjatë intervistës me moderatoren Alex Cooper.
“Ne ishim vetëm 12 vjeçe! Çfarë nuk shkon me këtë? Ne duhej të ishim shoqe të ngushta. Ne luanim si dy shoqe të ngushta. U bë shumë keq.”
Pavarësisht presionit që përjetuan si aktore të reja, Thorne tregoi se ajo dhe Zendaya, 29 vjeç, arritën ta zgjidhnin shpejt situatën mes tyre.
Ajo kujtoi një moment gjatë xhirimeve të një episodi crossover të “Good Luck Charlie”, kur të dyja vendosën të largoheshin nga seti për të biseduar larg kamerave.
“Arriti deri aty sa, kur ishim në crossover-in e ‘Good Luck Charlie’, u larguam fshehurazi në një set tjetër gjatë xhirimeve live — gjë që ishte shumë guximtare, rebele dhe e çmendur”, rrëfeu Thorne.
“Dolëm jashtë. E dinim që kishim edhe tre skena deri sa të riktheheshim dhe thjesht shkuam të flisnim.”
Aktorja tha se biseda me Zendaya-n ishte një nga përvojat më të rëndësishme të saj.
“Folëm hapur, i zgjidhëm gjërat dhe ishte diçka shumë e bukur”, tha ajo. “Ishte përvoja ime e parë — grua me grua, vajzë me vajzë — ku kupton që mund të komunikosh vërtet.”
Thorne e përshkroi atë bisedë mes tyre si “një nga diskutimet më të sinqerta mes dy vajzash”.
