Ellen DeGeneres ka pranuar se i mungon shumë jeta në televizion, katër vite pasi emisioni i saj i famshëm përfundoi transmetimin. Moderatorja dhe komediania amerikane, e cila tashmë jeton në Britaninë e Madhe, ka lënë të kuptohet se po mendon për mundësinë e projekteve të reja televizive.
Gjatë një interviste në emisionin The Graham Norton Show, 68-vjeçarja foli hapur për jetën e saj larg ekranit dhe për gjërat që i mungojnë më shumë nga karriera e saj e mëparshme.
“Për momentin nuk kam vërtet asgjë që po bëj dhe më mungon shumë të jem në televizion”, u shpreh ajo.
Ellen tregoi se ndër gjërat që i mungojnë më shumë janë momentet e kaluara me autorët e emisionit dhe publikun.
“Më mungojnë shumë gjëra prej tij, të qeshurat me autorët dhe me publikun. Mendoj për të bërë diçka këtu”, tha ajo, duke iu referuar mundësisë për të punuar në televizionin britanik.
Me humor, moderatorja shtoi se mendon që në Britaninë e Madhe është relativisht e lehtë të realizosh një program televiziv. Ajo përmendi disa formate britanike, përfshirë emisione për qeramikën, qepjen dhe programe ku njerëzit komentojnë shfaqje të tjera televizive.
Jeta e re në Britaninë e Madhe
Ellen DeGeneres u zhvendos në Britaninë e Madhe në vitin 2024, së bashku me bashkëshorten e saj, Portia de Rossi, dy vite pas përfundimit të emisionit The Ellen DeGeneres Show. Programi, i cili nisi transmetimin në vitin 2003, përfundoi më 26 maj 2022, pas 19 sezonesh dhe një karriere të gjatë në televizionin amerikan.
Mbyllja e tij erdhi pas polemikave të vitit 2020, kur disa punonjës ngritën akuza për një mjedis problematik pune. Pas një hetimi të brendshëm, DeGeneres u kërkoi falje punonjësve përmes një mesazhi dhe më vonë bëri një tjetër kërkimfalje. Pavarësisht polemikave, emisioni i saj mbeti një nga programet më të njohura të televizionit ditor amerikan, duke fituar çmime të shumta gjatë viteve.
Pas përfundimit të emisionit, DeGeneres iu rikthye humorit përmes një turneu me shfaqje live dhe publikoi më pas një speciale në Netflix, të cilën e kishte prezantuar si një lamtumirë për publikun. Megjithatë, në një intervistë për BBC-në në korrik 2025, ajo pranoi se po mendonte për projekte të reja.
“Dua të argëtohem, dua të bëj diçka. Më pëlqejnë pulat e mia, por jam pak e mërzitur”, tha ajo me humor, duke iu referuar jetës së saj të re në fshatin anglez.
