Studiuesi Taulant Muka ka ngritur akuza për censurë ndaj emisionit investigativ “Inside Story”, të transmetuar në Top Channel, duke pretenduar se nga versioni i publikuar në YouTube janë hequr disa pjesë që trajtonin plagjiaturën akademike dhe karrierën universitare të ministrit të Brendshëm, Ervin Demo.
Në reagimin e tij publik, Muka pretendon se nga versioni online i emisionit është fshirë pikërisht pjesa ku ai dhe Rigels Xhemollari flisnin për ato që i cilësojnë si plagjiatura në punimet akademike të Demos. Sipas tij, janë hequr gjithashtu edhe pjesë që trajtonin çështje të ngjashme lidhur me Evis Kushin dhe Ogerta Manastirliun.
Studiuesi e lidh këtë ndërhyrje të pretenduar me presionin e mundshëm të ministrit të Brendshëm, duke përfshirë në akuzat e tij edhe kryeministrin Edi Rama. Megjithatë, në reagimin e publikuar nuk paraqiten prova që të konfirmojnë se heqja e pjesëve është kryer me urdhër apo nën presionin e zyrtarëve të përmendur.
Muka e konsideron këtë rast një shqetësim serioz për lirinë e medias dhe pavarësinë e gazetarisë investigative. Sipas tij, emisioni trajtonte premtimet e pambajtura të Paktit për Universitetin dhe problematikat që, në vlerësimin e tij, kanë ndikuar në cilësinë dhe integritetin e arsimit të lartë në Shqipëri.
“Ky është një skandal i rëndë që tregon edhe një herë se si puna e pavarur dhe profesionale e gazetarëve vihet nën censurë sa herë që prek interesat e pushtetit”, shkruan Muka në reagimin e tij.
