Një seri zjarresh të dyshuara si të qëllimshme janë regjistruar gjatë orëve të para të mëngjesit në Durrës. Në total janë djegur 10 kazanë mbetjesh dhe janë dëmtuar tre automjete të parkuara. Vatra e parë u shfaq në rrugën “Enver Velja”, pranë shkollës “Kushtrimi i Lirisë”. Flakët përfshinë tetë kazanë dhe më pas u përhapën te tre makina të parkuara aty pranë. Pak më vonë, dy kazanë të tjerë u dogjën në rrugën “Mujo Ulqinaku”.
Zjarrfikësit ndërhynë dhe vunë flakët nën kontroll. Nga të dhënat paraprake dyshohet se zjarret janë të qëllimshme dhe mund të jenë shkaktuar nga i njëjti person. Policia po punon për identifikimin e autorit dhe zbardhjen e plotë të ngjarjes.
