Një gjykatë në New Mexico urdhëroi kompaninë Meta të paguajë edhe 567 milionë dollarë për dështimin në mbrojtjen e fëmijëve në platformat e saj. Vendimi i shtohet një gjobe të mëparshme prej 375 milionë dollarësh, duke e çuar totalin në 942 milionë dollarë. Gjykatësi Bryan Biedscheid e cilësoi Metën një "shqetësim publik", duke argumentuar se algoritmet e saj kanë ekspozuar fëmijët ndaj përmbajtjeve të dëmshme dhe grabitqarëve seksualë. Ai urdhëroi që një pjesë e fondeve të përdoret për programe të shëndetit mendor dhe mbështetje për viktimat.
Vendimi detyron gjithashtu Metën të forcojë masat e sigurisë për të miturit. Kompania duhet të ndalojë mesazhet nga të rriturit drejt përdoruesve nën 18 vjeç, të bllokojë rekomandimet e llogarive të tyre, të kufizojë përdorimin e Instagramit dhe Facebook-ut në 90 orë në muaj, si dhe të çaktivizojë njoftimet gjatë natës dhe orarit mësimor. Meta njoftoi se nuk pajtohet me vendimin dhe do ta apelojë atë, duke këmbëngulur se ka investuar vazhdimisht në mbrojtjen e adoleshentëve në platformat e saj. Rasti në New Mexico është vendimi më i madh financiar ndaj Meta-s për çështje që lidhen me sigurinë e fëmijëve, ndërsa kompania përballet edhe me mijëra padi të tjera në Shtetet e Bashkuara.
