Zjarret masive në jugperëndim të Francës kanë nxjerrë në dritë një depo të fshehur me rreth 400 predha dhe municione të Luftës së Dytë Botërore, duke shkaktuar dhjetëra shpërthime në fshatin Le Porge, në rajonin e Girondës. Fillimisht, autoritetet menduan se shpërthimet vinin nga bombolat e gazit. Megjithatë, verifikimet zbuluan se temperaturat e larta kishin aktivizuar municione historike të varrosura prej dekadash.
Kryebashkiaku Martial Zaninetti tha se gjatë natës u dëgjuan mbi 100 shpërthime. Depoja nuk ishte e njohur më parë nga banorët. Arsenali përfshinte municione gjermane dhe franceze, mes tyre predha mortajash dhe predha antitank të Luftës së Dytë Botërore. Zjarri në Girondë u vu nën kontroll pas rreth 10 ditësh, duke shkatërruar mbi 180 banesa dhe djegur rreth 42 mijë hektarë tokë, në një nga zjarret më të mëdha që ka përjetuar Franca në dekadat e fundit.
