Pas javësh të tëra protestash, mijëra qytetarëve në shesh dhe një simboli që është kthyer në identitetin e revoltës kundër qeverisë së tij, Edi Rama duket se ka zgjedhur një tjetër rrugë, ironinë.
Në një lëvizje që shumë do ta lexojnë si provokim, kryeministri ka ndryshuar foton e profilit në rrjetet sociale, duke vendosur një flamingo rozë, pikërisht simbolin e “Revolucionit të Flamingove”, lëvizjes që prej javësh kërkon largimin e tij nga pushteti.
Pas etiketimit të protestuesve si “proletariat i algoritmit”, pas akuzave për “luftë hibride”, Iran, Rusi, Greqi e deri te influencerët, Rama duket se po provon edhe strategjinë e ironizimit të simbolit të protestës. Një lëvizje që vjen në një moment kur protestat jo vetëm nuk janë shuar, por vazhdojnë çdo mbrëmje me pjesëmarrje të konsiderueshme.
Flamingoja, e cila u bë simbol pas përplasjes në Zvërnec dhe mbrojtjes së zonës së Nartës, është shndërruar tashmë në emblemën e një lëvizjeje që ka tejkaluar çështjen e një projekti turistik dhe është kthyer në një revoltë më të gjerë kundër qeverisë.
Ndryshimi i fotos së profilit është sinjali i fundit i një kryeministri që, përballë protestave që nuk po ndalen, duket se po kërkon mënyra gjithnjë e më të pazakonta për t’iu përgjigjur kundërshtarëve të tij. ©Lapsi.al
