Edhe arbitrat do të jenë protagonistë në Botërorin e ardhshëm, ku vëmendja ndaj tyre do të jetë shumë e madhe. Sezonin e fundit pothuajse në të gjithë Europën kanë shpërthyer polemika për arbitrimin dhe për këtë arsye presidenti i Komisionit të Arbitrave të FIFA-s, Pierluigi Collina, ka zgjedhur 52 profilet më të mira nga e gjithë bota. Përveç nderit për të drejtuar ndeshjet e turneut më të rëndësishëm, të përzgjedhurit do të përfitojnë edhe një shumë të konsiderueshme parash.
Ish-arbitri i Premier League, Mark Clattenburg, zbuloi se cilat ishin pagesat në Botërorin e fundit ku duhej të merrte pjesë, por nga i cili u tërhoq disa muaj përpara. Në një intervistë për podcastin Whistleblowers, ai shpjegoi se prej vitesh shifrat janë relativisht të qëndrueshme dhe se UEFA përdor prej kohësh një metodë të veçantë pagese: jo një shpërblim unik për të gjithë turneun, por një shumë për çdo ndeshje.
Pagesat e arbitrave në Botëror
Nuk janë në nivelin e futbollistëve profesionistë, por edhe arbitrat e profilit të lartë do të fitojnë një shumë të konsiderueshme nga Botërori 2026. Nga viti 2004 deri në 2017, Clattenburg ishte një nga arbitrat më të njohur të Premier League, u bë arbitër ndërkombëtar në vitin 2006 dhe drejtoi ndeshje në Champions League, Kampionate Europiane dhe Lojëra Olimpike. Kulmi i karrierës së tij ishte Euro 2016, ku u përzgjodh për të arbitruar finalen pasi kishte kaluar të gjithë rrugëtimin që nga faza e grupeve.
Anglezi shpjegoi: “Arbitrat më të suksesshëm fitojnë deri në 60 mijë euro, duke përfshirë edhe finalen. Pra, janë më shumë se 10 mijë euro për çdo ndeshje dhe gjithashtu përfiton një shumë tjetër si dietë ditore.” Në Euro 2016 ai arbitroi pesë ndeshje, duke fituar pothuajse 60 mijë euro mes pagesave për ndeshjet dhe shpërblimeve të tjera.
Clattenburg thekson se finalja paguhet më shumë se ndeshjet e tjera: “Për finalen merrej diçka më shumë sesa për ndeshjet e tjera të fazave finale. Nëse e krahason këtë shifër me paratë që qarkullojnë në futboll, duket mjaft e ulët. Besoj se kanë adoptuar një sistem pagese fikse për ndeshje, por nëse arrin të arbitrosh finalen, fitimi total lëviz mes 52 mijë dhe 60 mijë eurove.”
