Dua Lipa ka ndarë me fansat momente të veçanta me Callum Turner, duke publikuar në Instagram një seri fotografish intime nga ceremonia madhështore e zhvilluar më 6 qershor në Sicily.
Në fotografitë e publikuara, këngëtarja shfaqet me një fustan martese të personalizuar nga Chanel. Fustani kishte një dizajn elegant me shpinë të hapur dhe një bisht të gjatë të dekoruar me pupla, ndërsa pamja u kompletua me një aksesor në kokë dhe një vellë të gjatë të qëndisur.
Sipas revistës Vogue, ky ishte fustani i parë haute couture i nusërisë i krijuar nga drejtori kreativ i Chanel, Matthieu Blazy, për një mike të shtëpisë së famshme të modës.
Mes fotove të publikuara, njëra tregon çiftin duke vallëzuar mes atmosferës festive të ceremonisë, ndërsa një tjetër, bardhezi, i paraqet ata në një tarracë guri me pamje nga ambientet e rezidencës ku u mbajtën festimet.
Fotografi të tjera nxjerrin në pah pamjen e nusërisë së Dua Lipës, përfshirë një portret solo nën një hark dekorativ dhe një imazh ku velloja e saj e gjatë shtrihet pas saj ndërsa pozon pranë Turner.
Publikimi i këtyre imazheve vjen vetëm pak javë pasi çifti kurorëzoi dashurinë në një ceremoni të mbajtur më 31 maj në Old Marylebone Town Hall.
Për ceremoninë intime në Londër, Dua Lipa zgjodhi një kostum të bardhë të personalizuar nga Schiaparelli, të dizajnuar nga Daniel Roseberry.
Festimet vijuan më pas në Sicili, ku çifti organizoi një ceremoni më të madhe në vilën historike Villa Valguarnera. Në ngjarjen disaditore morën pjesë familjarë, miq të afërt dhe emra të njohur të industrisë së argëtimit, mes tyre Charli XCX, Joe Alwyn dhe Grace Gummer.
Dua Lipa dhe Callum Turner u përfolën për herë të parë si çift në fillim të vitit 2024, ndërsa e bënë publike lidhjen e tyre në rrjetet sociale në korrik të po atij viti. Në korrik 2025, këngëtarja konfirmoi fejesën me aktorin gjatë një interviste për Vogue.
“Vendimi për t’u plakur bashkë, për të ndërtuar një jetë së bashku dhe për të qenë miqtë më të mirë përgjithmonë është një ndjenjë vërtet e veçantë,” u shpreh Dua në atë kohë.
