Dëmtimi i frikshëm i Cillessen: zorrë e shpuar në bark pas një goditje me gju

Ajo që i ndodhi Jasper Cillessen gjatë ndeshjes mes Celta Vigos dhe Las Palmas është vërtet e tmerrshme. Portieri u largua nga fusha me barrelë pas një përplasjeje me Borja Iglesias dhe u transportua menjëherë në spital, pasi iu konstatua një perforim i zorrës. Një situatë që fillimisht dukej e zakonshme, por që përfundoi me një operacion urgjent për të trajtuar traumën e rëndë abdominale të pësuar në përpjekje për të ndalur topin para portës së tij. Sipas raportimeve të radios “SER”, lojtari i Las Palmas u operua gjatë natës, pasi kishte ndjerë për një kohë të gjatë dhimbje në zonën e barkut pas përplasjes me kundërshtarin. Askush nuk e kishte imagjinuar një dëmtim kaq serioz, por në fund ndërhyrja kirurgjikale ishte e domosdoshme për të shmangur pasoja edhe më të rënda.

💛💙 ÁNIMO JASPER CILLESSEN 💛💙 pic.twitter.com/O79O2jX1Oo

— udlaspalmas.NET (@udlaspalmasNET) March 31, 2025

Çfarë ndodhi me Cillessen: zorrë e shpuar pas një goditjeje me gju

Në pamje të parë, aksioni dukej si një episod i zakonshëm loje. Në minutën e 24-t, Cillessen doli nga porta për të ndalur Borja Iglesias, i cili po vraponte drejt zonës së rreptësisë. Por, në vend që të godiste topin, sulmuesi e qëlloi fort me gju në barkun e portierit të Las Palmas, i cili mbeti i shtrirë në dhimbje të forta. Holandezi sinjalizoi menjëherë drejt pankinës për seriozitetin e dëmtimit dhe u zëvendësua menjëherë nga Horkas. Ai u largua nga fusha me barrelë, ndërsa publiku mbeti i tronditur, pa e kuptuar fillimisht shkallën e vërtetë të lëndimit. Ish-portieri i Barcelonës u transportua urgjentisht në spitalin më të afërt pasi kishte filluar të vjellë. Pas disa ekzaminimeve, mjekët zbuluan dëmin e rëndë: goditja e kundërshtarit i kishte shkaktuar një traumë të rëndë abdominale, duke i shpuar zorrën. Operacioni urgjent gjatë natës i shpëtoi jetën, pasi një dëmtim i tillë mund të kishte pasoja shumë të rënda nëse nuk trajtohej në kohë.