Personi që ishte shënjestra e atentatit të mesditës në një lokal të frekuentuar në Elbasan është identifikuar si Mir Bitoci, i cili prej vitesh jeton jashtë Shqipërisë. Emri i tij është përmendur edhe në periudhën e trazirave të viteve 1997-2000.
Pamjet e kamerave të sigurisë ndihmojnë në rindërtimin e lëvizjeve të autorit dhe të shënjestrës. Bitoci shihet fillimisht brenda lokalit, ku qëndron për disa minuta, përpara se të ngrihet dhe të largohet.
Në të njëjtin lokal ndodhej edhe personi që dyshohet se e kishte ndjekur. Ai ishte ulur në një tavolinë tjetër, duke pirë kafe në shoqërinë e një gruaje.
Pak çaste pasi Bitoci del jashtë, edhe autori largohet nga lokali dhe i shkon pas. Sipas pamjeve, jashtë ambientit, ai i afrohet nga pas dhe i drejton një pistoletë në pjesën e pasme të kokës.
Atentati, megjithatë, nuk u realizua. Arma dyshohet se u bllokua në momentin kur autori tentoi të qëllonte, duke i dhënë mundësi Bitocit t’i shpëtonte sulmit.
Policia vijon punën për identifikimin dhe kapjen e autorit, ndërsa pamjet filmike dhe dëshmitë e personave që ndodheshin në lokal janë pjesë e provave që po shqyrtohen për zbardhjen e plotë të ngjarjes.
