Victoria Beckham ka deklaruar se nuk ka ndërmend të tërhiqet nga puna, duke thënë se është ende plotësisht e përkushtuar ndaj karrierës së saj në modë dhe biznes.
Në një intervistë për gazetën britanike The Times, 52-vjeçarja u shpreh se e do atë që bën dhe nuk e sheh veten larg punës në të ardhmen e afërt.
“E dua atë që bëj. E dua ekipin me të cilin punoj. Kështu që, për momentin, jo (nuk planifikoj të tërhiqem),” tha ajo.
Beckham shtoi se nuk do të ndihej mirë pa punë:
“Sinqerisht, do të mërzitesha shumë. Më pëlqen të jem e zënë.”
Ajo theksoi gjithashtu rëndësinë e shembullit për fëmijët e saj me David Beckham, duke thënë se dëshiron që ata të shohin pasionin dhe etikën e punës së prindërve të tyre.
“Është mirë që fëmijët të shohin sa e rëndësishme është puna dhe pasioni. Ata kanë ambicie dhe janë të motivuar,” u shpreh ajo.
Victoria Beckham u bë e njohur në vitet ’90 si pjesë e grupit “Spice Girls”, përpara se të ndërtonte karrierë solo në muzikë dhe më pas të themelonte markën e saj të modës.
Ajo ka folur më herët edhe për vështirësitë në biznesin e saj të modës, duke pranuar se ka kaluar një periudhë të vështirë financiare dhe se kompania e saj ishte afër mbylljes.
Në dokumentarin e saj në Netflix, Beckham rrëfeu se kishte kaluar një periudhë shumë të rëndë stresuese dhe ndryshimesh të mëdha në strukturën e biznesit për ta shpëtuar atë.
Sot, ajo thotë se ndihet më e qëndrueshme dhe e fokusuar, duke pranuar gabimet e së kaluarës dhe duke theksuar se ka “gjetur sërish rrugën e saj”.
