Rreth dy vite pasi mori detyrën në krye të Hetimit Tatimor, ish-prokurori i Krimeve të Rënda është shkarkuar nga kjo detyrë.
Lajmi konfirmohet nga burime të Lapsi.al në Ministrinë e Financave. Mësohet gjithashtu se në vend të tij është emëruar Everest Kazheli, i cili deri pak ditë më parë mbante detyrën e drejtorit të Kadastrës në Fier.
Kazheli konsiderohet si njeri i afërt i Belinda Ballukut, e cila ndonëse në pozita të rënduara ligjore prej hetimeve të SPAK, vijon të ushtrojë ndikim politik në emërime të ndryshme në pozicione kyçe të administratës.
Me siguri shërbimi që Kazheli i ka bërë Ballukut në qarkun Fier për zgjedhje, po i shpërblehet me një gradim të ri në një institicion jo pak të rëndësishëm.
Ndonëse në krye të Ministrisë së Financave është Petrit Malaj, është një sekret publik që pushtetin real në atë dikaster e ka Belinda Balluku, njësoj si në Ministrinë e Infrastrukturës, Ministrinë e Mbrojtjes dhe institucione të tjera. /Lapsi.al
