Shtetet e Bashkuara po planifikojnë të ulin ndjeshëm praninë e tyre ushtarake brenda NATO-s, sipas revistës gjermane Der Spiegel. Kjo lëvizje pritet të rrisë presionin mbi aleatët europianë për të mbushur boshllëqet e krijuara. Sipas raportimit, një përfaqësues i ministrit amerikan të Luftës, Pete Hegseth, ka informuar zyrtarë të lartë të NATO-s për ndryshimet e planifikuara në kapacitetet amerikane në Evropë. Uashingtoni synon të reduktojë numrin e avionëve luftarakë, anijeve luftarake, dronëve dhe avionëve furnizues, si dhe të rishikojë angazhimet në kuadër të modelit të forcave të NATO-s të miratuar në vitin 2022.
Sipas burimeve, SHBA-të mund të ulin me rreth një të tretën kontributin e tyre në aviacionin luftarak dhe të prekin edhe bombarduesit strategjikë e aeroplanmbajtëset. Ata pritet të ruajnë me trupa të plotë vetëm kapacitetin bërthamor në Evropë.
Në Bruksel, këto plane kanë shkaktuar shqetësim, ndërsa aleatët europianë janë të thirrur të propozojnë zgjidhje për mbulimin e boshllëqeve deri në fillim të qershorit, përpara samitit të NATO-s në korrik. Sipas arsyetimit të Uashingtonit, riorganizimi lidhet me fokusin e ri strategjik drejt Indo-Paqësorit dhe një përballjeje të mundshme me Kinën.
