Portugalia refuzon tërheqjen e CR7: “Nuk e pranojmë një lamtumirë të tillë, duhet një ndeshje e fundit”

Cristiano Ronaldo ka njoftuar largimin nga kombëtarja dhe Federata Portugeze e Futbollit ka reaguar me këtë komunikatë: “Federata Portugeze e Futbollit shpreh mirënjohjen e saj më të thellë dhe të përhershme për kapitenin e saj të përjetshëm, Cristiano Ronaldo, i cili sot njoftoi tërheqjen përfundimtare nga Kombëtarja. Me një ndjenjë të thellë mirënjohjeje dhe admirim të jashtëzakonshëm, Federata Portugeze e Futbollit e vlerëson dhe e falënderon publikisht Cristiano Ronaldon për karrierën e tij të jashtëzakonshme në shërbim të vendit tonë. Përtej faktit se është një sportist i jashtëzakonshëm, kapiteni ynë është një lider karizmatik, një shembull përkushtimi dhe simboli më përfaqësues i shpirtit të kombëtares sonë. Gjatë një karriere legjendare ndërkombëtare, të karakterizuar nga 234 paraqitje dhe 146 gola, kapiteni ka mbajtur mbi supe kombin, ka thyer rekorde dhe e ka udhëhequr skuadrën drejt momenteve që do të mbeten përgjithmonë të gdhendura në historinë e futbollit kombëtar. Çdo pikë djerse, çdo gol vendimtar dhe çdo shirit kapiteni i mbajtur me krenari në fushë pasqyronin dashurinë e tij të pakushtëzuar për fanellën tonë. Përkushtimi dhe trashëgimia e tij shkojnë përtej katër vijave të fushës. Cristiano Ronaldo e ka lartësuar emrin e Portugalisë dhe ka frymëzuar breza të të rinjve që ëndërrojnë të ndjekin gjurmët e tij. Për shumë prej nesh, ai është lojtari më i mirë i të gjitha kohërave!”

Më pas erdhi njoftimi për organizimin e një ndeshjeje lamtumire, në mënyrë që tifozët të kenë mundësinë t’i japin përshëndetjen e fundit CR7-ës: “Prandaj, Federata Portugeze e Futbollit refuzon të lejojë që kjo lamtumirë të ndodhë pa nderimin e duhur. Është dëshira jonë e palëkundur dhe e madhe të organizojmë, planifikojmë, marrim pjesë dhe të bashkëpunojmë në mënyrë aktive për atë që do të jetë gjithmonë një homazh i denjë për karrierën e jashtëzakonshme të Cristiano Ronaldos, ku tifozët dhe vendi do të mund ta duartrokasin dhe ta festojnë edhe një herë lojtarin që na ka dhënë kaq shumë”.

Në fund, federata përcolli falënderimet e saj dhe motivimin për të arritur objektivin e 1.000 golave në karrierë, të cilin Ronaldo, në këtë pikë, mund ta ndjekë vetëm me fanellën e Al Nassr: “Faleminderit për gjithçka, Kapiten! Kjo do të jetë gjithmonë shtëpia jote! Të synojmë arritjen e objektivit prej 1.000 golash!!!”.