Jorge Mendes është sërish protagonist i merkatos së Milanit. Gerry Cardinale, presidenti i kuqezinjve, duket se i ka besuar pikërisht menaxherit të fuqishëm portugez për të rindërtuar të gjithë skuadrën e “Djallit”, për t’ia dorëzuar më pas Ruben Amorim. Trajneri ish-i United do të ketë në dispozicion edhe anësorin Diego Moreira, blerjen e tretë të Milanit në këtë sesion merkatoje, të paguar plot 50 milionë euro dhe të ardhur nga Strasburgu.
Pas Goncalo Ramos nga PSG, i paguar 70 milionë euro, vjen edhe një tjetër shpenzim i rëndësishëm ekonomik për kuqezinjtë, të cilët me vetëm dy blerje të menaxhuara nga Mendes kanë arritur tashmë kuotën e 120 milionë eurove. Në mes është Mario Gila – që nuk menaxhohet nga Mendes – për të cilin Milani investoi 30 milionë të tjera, duke arritur në total 150 milionë euro për tre lojtarë. Me pak fjalë, Mendes duket se ka bërë edhe më shumë. Përveçse ka sjellë në Milan dy lojtarë në përpjekje për t’i lançuar përfundimisht dhe për t’u rritur vlerën, ai do të kishte qenë vendimtar edhe në marrëveshjen për Moreiran. Mendes thuhet se e ka drejtuar vetë operacionin.
Milani duket se është shndërruar për Mendes në një lloj kanali të privilegjuar për lojtarët e tij. Mjafton të kujtojmë se edhe Roma kishte menduar për Moreiran që në korrik, por nga ana tjetër kishte hasur një kërkesë prej 70 milionë eurosh nga Strasburgu, ndërsa Milani arriti ta marrë për 50 milionë euro (por sigurisht nuk duhet të harrohen klauzolat e ndryshme të përfshira në marrëveshje, të cilat me kalimin e kohës mund të rrisin edhe koston totale të operacionit, shën. i red.). Me pak fjalë, Mendes është ende aty për Milanin. Edhe sezonin e kaluar një tjetër lojtar i agjentit portugez, si Estupinian, kishte mbërritur te kuqezinjtë, pa harruar qëndrimin e Sergio Conceicaos si trajner, një tjetër produkt i “strehës” së Mendes.
Cilët janë lojtarët e tjerë të Serie A të menaxhuar nga Mendes
Jorge Mendes, i njohur mbi të gjitha si agjenti historik i Cristiano Ronaldos dhe tashmë edhe i Lamine Yamal, punon shumë me kampionatin e Serie A, aq sa, përveç Moreiras dhe Ramos te Milani, menaxhon edhe Francisco Conceicaon te Juventusi, ashtu si Rodrigo Mora – që pritet të bëhet lojtar i ri i Romës – pa harruar Tiago Gabriel të Lecces, Amorim të Genoas dhe Correian e Venezias. Duke marrë parasysh edhe blerjen e afërt të Moras nga Roma për 25 milionë euro, Mendes, vetëm me tre lojtarë mes Milanit dhe Romës, ka drejtuar operacione me vlerë totale prej 145 milionë eurosh.
