Dy shqiptarë janë arrestuar në Itali për tentativën e vrasjes së një 25-vjeçari në Mirano. Luigj Makaj, 44 vjeç, dhe Armiol Gjoka, 40 vjeç, u kapën mëngjesin e 27 korrikut, pas afro një muaji në arrati. Dy të dyshuarit i zunë pritë në 1 korrik të riut shqiptar, të identifikuar me inicialet R.K., dhe e qëlluan me armë.
Prokuroria dyshon se konflikti lidhej me vendimin e 25-vjeçarit për t’u shkëputur nga shitja e drogës dhe për të nisur punë në sektorin e ndërtimit. Ky vendim dyshohet se nuk ishte pranuar nga grupi kriminal. Hetuesit zbuluan se ndaj të riut dhe partneres së tij ishte qëlluar edhe disa muaj më parë. Lokalizimi i dy të dyshuarve u bë përmes përgjimeve, ndjekjeve dhe gjurmëve elektronike. Gjatë operacionit u kontrolluan edhe banesat e personave të afërt me ta. Autoritetet sekuestruan telefona dhe komunikime që pritet të ndihmojnë hetimin. Makaj dhe Gjoka janë dërguar në dy burgje të ndryshme, në Venecia dhe Padova.
