Seanca për konstituimin e Kuvendit të Kosovës do të vijojë të shtunën në orën 11:00, pavarësisht se afati 30-ditor i përcaktuar nga Gjykata Kushtetuese për përfundimin e saj skadon të premten në mesnatë.
Vendimin për shtyrjen e vazhdimit të seancës e ka marrë kryesuesi i saj, Avni Dehari, pasi mbledhja e së enjtes mbeti e papërfunduar. Shtyrja erdhi pas kërkesës së kryeministrit në detyrë dhe kreut të Lëvizjes Vetëvendosje, Albin Kurti, për më shumë kohë për negociata politike lidhur me formimin e institucioneve të reja.
Njoftimi për vazhdimin e seancës të shtunën u bë pak orë pas një tjetër takimi mes Kurtit dhe kryetarit të Lidhjes Demokratike të Kosovës, Lumir Abdixhiku, i cili përfundoi pa një marrëveshje për zgjidhjen e ngërçit politik.
Vendimi i Deharit është kundërshtuar nga Partia Demokratike e Kosovës, e cila e ka cilësuar shtyrjen si shkelje të vendimit të Gjykatës Kushtetuese dhe një precedent të rrezikshëm për funksionimin e shtetit ligjor.
Ekspertët kushtetues kanë ngritur gjithashtu shqetësime për tejkalimin e afatit. Eugen Cakolli nga Instituti Demokratik i Kosovës e ka cilësuar këtë veprim si “shkelje të hapur dhe cenim të drejtpërdrejtë të rendit kushtetues”.
Ndërkohë, mbetet e paqartë nëse deputetët e opozitës do të marrin pjesë në seancën e së shtunës, ndërsa përpjekjet për arritjen e një marrëveshjeje politike mes partive kryesore vijojnë pa rezultat.
