Kina ka shkarkuar nga postet shtetërore dy prej zyrtarëve më të lartë ushtarakë të vendit, gjeneralët Zhang Guxia dhe Liu Zhenli, pas një hetimi disamujor për shkelje të rënda të disiplinës dhe ligjit. Zhang Guxia, ish-nënkryetar i Komisionit Qendror Ushtarak dhe një prej figurave më të fuqishme të ushtrisë kineze, është përfshirë në akuza veçanërisht të rënda. Ai dyshohet se ka nxjerrë informacione teknike të klasifikuara mbi armët bërthamore të Kinës drejt Shteteve të Bashkuara.
Sipas raportimeve nga mediat e huaja, gjenerali 75-vjeçar dyshohet gjithashtu se ka marrë shuma të mëdha parash në këmbim të promovimeve ushtarake, duke përfshirë favorizimin e zyrtarëve për poste të rëndësishme në sistemin e mbrojtjes. Hetimi ndaj Zhang lidhet edhe me dyshime për krijimin e rrjeteve politike brenda ushtrisë dhe abuzim me pushtetin gjatë drejtimit të një strukture përgjegjëse për kërkimin, zhvillimin dhe prokurimin e pajisjeve ushtarake.
Edhe Liu Zhenli, anëtar i Komisionit Qendror Ushtarak dhe ish-shef i Shtabit të Përgjithshëm, është përfshirë në hetim për shkelje të rënda të disiplinës dhe ligjit. Të dy gjeneralët kishin munguar në disa aktivitete të rëndësishme publike muajt e fundit, çka kishte shtuar dyshimet për fatin e tyre politik. Shkarkimi i tyre vjen pas një vale të gjerë spastrimesh në nivelet e larta të ushtrisë kineze.
Në tetor 2025, Kina kishte shkarkuar nëntë gjeneralë të lartë, në një prej fushatave më të mëdha të spastrimit brenda ushtrisë në dekadat e fundit. Presidenti Xi Jinping ka intensifikuar luftën kundër korrupsionit në radhët e forcave të armatosura, duke e konsideruar atë një kërcënim serioz për Partinë Komuniste dhe kontrollin e saj mbi ushtrinë.
Zhang Guxia ishte një figurë veçanërisht e rëndësishme për shkak të pozitës së tij në hierarkinë ushtarake dhe lidhjeve familjare me elitën politike kineze. Babai i tij ishte një nga figurat e hershme të Partisë Komuniste dhe kishte luftuar përkrah babait të Xi Jinping gjatë Luftës Civile Kineze.
Megjithatë, akuzat për rrjedhjen e sekreteve bërthamore dhe marrjen e ryshfeteve janë ende akuza dhe jo një dënim përfundimtar gjyqësor. Vetë autoritetet kineze, në njoftimet zyrtare, kanë përdorur formulimin e përgjithshëm për shkelje të rënda të disiplinës dhe ligjit.
