Protestuesit kanë mbyllur fjalimet para godinës së Kryeministrisë dhe kanë nisur marshimin në rrugët e Tiranës. Nën thirrjet “Ju erdhi fundi”, “Rama, jep dorëheqjen!”, “Shqipëria kërkon revolucion” dhe slogane të tjera kundër qeverisë, qindra qytetarë marshojnë në bulevardet e kryeqytetit. Gjatë tubimit para Kryeministrisë, dhjetëra qytetarë morën fjalën për të shprehur pakënaqësitë e tyre ndaj qeverisjes, duke folur për korrupsionin, emigracionin, gjendjen ekonomike dhe nevojën, sipas tyre, për një ndryshim të klasës politike.
Edhe në ditën e 49-të, protestuesit deklaruan se nuk do të negociojnë kërkesat e tyre dhe se protesta do të vazhdojë deri në arritjen e objektivit që kanë shpallur që në nisje të saj. Në shesh ishin të pranishëm të rinj, familje me fëmijë, pensionistë, aktivistë dhe përfaqësues të profesioneve të ndryshme, të cilët iu bashkuan edhe një herë marshimit që prej javësh zhvillohet çdo mbrëmje në rrugët e kryeqytetit.
