Një shqiptar 68-vjeçar është arrestuar në Follorinë të Greqisë, pasi u kap me mbi 55 kilogramë marijuanë. Operacioni u zhvillua nga Departamenti i Hetimit dhe Ndjekjes Penale të Krimeve. Sipas policisë greke, arrestimi erdhi pas informacioneve të siguruara në kuadër të luftës kundër trafikut të drogës. Efektivët lokalizuan automjetin që drejtohej nga 68-vjeçari dhe e ndaluan për kontroll.
Brenda makinës u gjetën dy çanta udhëtimi dhe një thes me 50 pako marijuanë. Lënda narkotike kishte një peshë totale prej 55 kilogramë e 422 gramësh. Policia sekuestroi gjithashtu tre telefona celularë. Rasti vjen në një periudhë kur autoritetet greke raportojnë rritje të trafikut të drogës nga Shqipëria. Gjatë 11 muajve të fundit, në Igumenicë, Janinë, Kostur, Follorinë dhe Selanik janë sekuestruar mbi 1.2 ton marijuanë.
Sipas të dhënave të policisë, pjesa më e madhe e rasteve lidhen me linjën Sarandë-Igumenicë. Në një prej operacioneve, autoritetet greke sekuestruan edhe një skaf të ngarkuar me drogë.
