Gatti kritikohet nga tifozët e Juventusit për festimin ndaj Milanit: çështje mentaliteti

Juventus i besoi intuitës së teknikut Luciano Spalletti, i cili në minutat e fundit të sfidës ndaj Milanit vendosi të hidhte në fushë mbrojtësin Federico Gatti, duke e aktivizuar si sulmues. Mbrojtësi, duke shfrytëzuar centimetrat e tij, arriti të shënonte golin e barazimit përfundimtar 1-1, që shpërtheu festën në “Allianz Stadium”. Por ajo që shkaktoi diskutime ishte koha që vetë Gatti humbi duke festuar, ndërkohë që kishte ende pak kohë për të tentuar të përfundonte përmbysjen, të kthente ndeshjen dhe të merrte tri pikët. Pas golit, Gatti shkoi të festonte përpara tribunës së tifozëve bardhezinj, duke u ngjitur në këmbë mbi tabelat reklamuese dhe duke bërtitur. Mbrojtësi përqafoi shokët e skuadrës, u tregoi muskujt tifozëve në tribunë dhe vetëm më pas u rikthye në gjysmën e vet të fushës.

Kohë e çmuar e humbur, që për disa është shenjë e mungesës së pjekurisë dhe e një mentaliteti fitues që ende nuk ka arritur të hyjë në mendësinë e futbollistëve bardhezinj. Tifozët në rrjetet sociale, përkundrazi, e kanë krahasuar atë që bëri Gatti me veprimin e Hermosos në Roma-Atalanta. Mbrojtësi verdhekuq, pas golit të përkohshëm të barazimit, nuk festoi aspak, por u kthye menjëherë për të marrë pozicionin e tij në gjysmën e fushës, njësoj si shokët e skuadrës.

Për kundërshtarët që sapo kanë pësuar atë gol, kjo do të thotë të ndjesh presion. Të kuptosh se përballë ke dikë që është i bindur se mund ta përmbysë ndeshjen dhe ta fitojë atë, duke shfrytëzuar çdo top dhe duke luftuar si një luftëtar, nuk është e lehtë. Dhe pikërisht kjo ndodhi në “Olimpico”, me Romën që nuk u dorëzua për asnjë çast, duke e detyruar Atalantën të mbyllej në zonën e saj të rreptësisë dhe më pas, në mënyrë të pashmangshme, të pësonte golin. Në “Stadium”, përkundrazi, ndodhi e kundërta. Milani, pasi pa reagimin e bardhezinjve ndaj atij barazimi që dukej si ar i pastër duke parë festimin, tentoi ta prishte “festën”, duke provuar madje të fitonte ndeshjen me atë kundërsulm të tentuar nga Cisse, i cili më pas u përplas me vetë autorin e golit Gatti.

ADN-ja bardhezi, aq shumë e lartësuar nga Spalletti mes sezonit të kaluar dhe atij aktual, duket se është ende një kujtim i largët i atij koncepti të cilit familja Agnelli i kushtonte aq shumë rëndësi dhe që ishte përvetësuar tërësisht nga Juventusi i dikurshëm, i përbërë nga emra si Del Piero, Nedved, Buffon, Trezeguet, Thuram, Pirlo, Marchisio dhe shumë të tjerë, vetëm për të përmendur disa. Një skuadër e aftë të luante me bindjen se mund të fitonte, duke përballuar çdo kundërshtar kokë më kokë dhe pa frikë. Sot, megjithatë, festimi i bërë nga Gatti tregon ende një Juventus në versionin “provincial” – me gjithë respektin për skuadrat që përfshihen në këtë përkufizim – që duket se kënaqet me një barazim në ekstrem ndaj Milanit, pa marrë përsipër rrezikun për të provuar ta fitojë ndeshjen.

Një skuadër që duket e paaftë të tregojë forcën e saj në momentet kur duhet t’i frikësojë kundërshtarët, pikërisht atëherë kur ata janë më të brishtë. Mentaliteti fitues është pikërisht ai që tregoi Hermoso, i cili nuk humbi asnjë sekondë duke festuar pasi pa topin e goditur me kokë të përfundonte në rrjetë. Roma deshi t’i komunikonte Atalantës se nuk do t’i jepte asnjë moment qetësie “Deas” deri në vërshëllimën e trefishtë të arbitrit. Një çështje mentaliteti, pikërisht ajo që për Juventusin, në ditët e sotme, duket ende si një kujtim i largët i së kaluarës.