Vatra e zjarrit në masivin pyjor të Lofkendit në Mallakastër vijon të jetë ende aktive, duke shkrumbuar prej ditësh sipërfaqe të mëdha toke. Si pasojë e flakëve masive, edhe mëngjesin e sotëm ka rifilluar ndërhyrja nga ajri. Pavarësisht "luftës" për izolimin e flakëve, zjarri vijon të mbetet i përmasave të mëdha, duke rrezikuar përhapjen në një perimetër më të gjerë.
Duke u favorizua edhe era dhe temperaturat e larta, flakët janë përhapur edhe më shumë mbasditen e së mërkurës, duke djegur pisha. Situata më kritike paraqitet në fshatrat Riban dhe Ngraçan. Në terren janë angazhuar 4 mjete zjarrfikëse, 25 efektivë të Mbrojtjes nga Zjarri dhe Shpëtimit, 30 punonjës të forcave bashkiake dhe 50 trupa të Forcave të Armatosura, të cilët po punojnë për izolimin e flakëve.
