Finalja e Botërorit ende nuk ka nisur, por polemikat kanë shpërthyer për disa zgjedhje të FIFA-s. Për herë të parë në historinë e këtij kompeticioni, edhe konferenca për shtyp që do të mbahet një ditë para ndeshjes më të rëndësishme në botë do të jetë me pagesë. Tifozët do të mund të marrin pjesë, sigurisht duke blerë një biletë, për të dëgjuar De la Fuente dhe Scaloni që do të dialogojnë me gazetarët e akredituar, të vetmit që do të kenë të drejtën t’u bëjnë pyetje dy trajnerëve.
Kush dëshiron ta përjetojë këtë eksperiencë do të duhet të paguajë 70 euro (20 euro nëse dëshiron të marrë me vete edhe fëmijë) dhe të ulet vetëm pak metra larg dy protagonistëve në pankinat e finales. Nuk ishte çmimi i biletës ai që ndezi polemikat, por vetë domethënia e kësaj nisme, e cila nxjerr në shitje edhe një eksperiencë të lidhur me rrëfimin sportiv, një hapësirë ku zakonisht takohen vetëm trajnerët dhe gazetarët, ndërsa tifozët mund ta ndjekin vetëm nga larg.
Tifozët do të mund të hyjnë në konferencën për shtyp
Deri më sot, salla e konferencave për shtyp ka qenë një hapësirë institucionale, e rezervuar vetëm për gazetarët dhe trajnerët. Konferencat për shtyp para finales së Botërorit zhvillohen në një moment shumë delikat, por FIFA ka vendosur t’i komercializojë duke nxjerrë në shitje biletat për të hyrë: 70 euro për të rriturit dhe 20 euro për fëmijët, megjithëse askush prej tyre nuk do të ketë të drejtën të bëjë pyetje. Është një përpjekje për ta shndërruar në spektakël çdo moment dhe për ta kthyer në një mundësi biznesi, një koncept larg botës së futbollit, ku disa rituale konsiderohen ende të shenjta.
Konferencat për shtyp me pagesë janë vetëm vendimi i fundit i FIFA-s, e cila ka shfrytëzuar në çdo mënyrë këtë Botëror: nga biletat që kanë arritur të kushtojnë mijëra dollarë deri te pushimet për hidratim, çdo eksperiencë është vënë në shitje për të gjeneruar të ardhura, duke ndryshuar edhe marrëdhënien mes tifozëve dhe sportit të tyre, i cili gjithmonë është konsideruar popullor dhe larg disa dinamikave të argëtimit që në Shtetet e Bashkuara janë shumë të përhapura.
