Një person ka humbur jetën në lagjen Bregu i Diellit në Prishtinë mbrëmjen e së mërkurës, si pasojë e plagëve të marra nga arma e zjarrit. Sipas mediave të Kosovës, viktima është identifikuar si Agron Hajdari, rreth të 40-ave, një person me precendentë të mëparshëm penalë.
Lajmin e ka konfimruar edhe Policia e Kosovës. Ngjarja ka ndodhur rreth orës 20:30 në rrugën “Sali Nivica”, bëri të ditur zëdhënësi i Policisë për rajonin e Prishtinës, Enis Pllana.
“Rreth orës 20:30 kemi marrë informatën për të shtëna me armë zjarri, në rrugën “Sali Nivica” në Prishtinë. Njësitet policore dhe ekipi mjekësor, menjëherë kanë dalë në vendin e ngjarjes, ku nga ekipi mjekësor është konstatuar vdekja e një personi (mashkull)", - ka deklaruar Pllana.
Policia në koordinim me prokurorinë ka nisur një hetim lidhur me rrethanat e këtij rasti./ RTK.
