Partia Demokratike mblodhi sot pasdite kryesinë e saj. Në fokus janë disa ndryshime në statut të cilat do të miratohen më pas nga Kuvendi Kombëtar që thirret të shtunën. Në fjalën e tij kryedemokrati Berisha foli për ndryshime të rëndësishme në këtë forcë.
“Ne finalizojmë me Kuvendin tonë Kombëtar procesin e zgjedhjeve në PD dhe sanksionojmë bazat për një transformim të vërtetë të PD, transformim i cili parakupton apo nënkupton ripërtëritjen e forcës tonë politike, nënkupton organizim, organizim, organizim për këtë forcë, nënkupton modernizimin e saj dhe e fundit dhe më e rëndësishmja, nënkupton përpunimin e vizionit të kësaj partie në këto shtylla” – tha Berisha.
Më pas Berisha foli për transformim të PD-së dhe një mision historik për rikthimin e votës së lirë të qytetarëve shqiptarë dhe rikthimin e PD-së në pushtet. Më pas Berisha foli për ripërtëritje të PD-së dhe anëtarësime të reja.
“PD, në rrafshin organizativ, do jetë partia e seksionit. Ne jemi parti e territorit, pra ne jemi parti e seksionit. Dhe, përparësi absolute në piramidën e saj merr themeli, i cili është seksioni.
Ripërtëritja nënkupton anëtarësime të reja. Nënkupton zhdukjen e çdo barriere që pengon anëtarësimet e reja. Nënkupton hapjen e dyerve në nivel seksioni dhe në të gjitha nivelet për prurje të reja, angazhime të reja.
Ju garantoj se janë me mijëra e mijëra demokrate e demokratë që të gatshëm të anëtarësohen dhe të marrin përgjegjësi, por që nuk u ofrohet kjo mundësi. Nuk u ofrohet ky mjedis.
Nuk u ofrohet sepse, e kam theksuar dhe e theksoj, sëmundja e opozitarizmit është inercia, është apatia. Dhe kjo sëmundje bën që të tregohemi indiferentë ndaj këtij procesi që është jetik për PD-në.
PD sot më shumë se kurrë ka nevojë për eficencë. Eficencën e çdonjërit prej drejtuesve, prej anëtarëve të saj. Ka nevojë për treguesit e matjes së kësaj eficencë në mënyrë që potencialet e saj të shfrytëzohen në shkallë maksimale” – tha Berisha. ©LAPSI.al
