Në javën e 28-të të Premier League, Chelsea triumfon 1-0 ndaj Leicesterit dhe i rrëmben vendin e katërt Manchester City. Cole Palmer humb një penallti në minutën e 22' pas pritjes së Hermansen, por në minutën e 60' Cucurella siguron tre pikët për Blutë me një diagonale të bukur. Rikuperim i madh i Tottenham, që edhe pse merr vetëm një pikë, shmang humbjen ndaj Bournemouth, duke kaluar nga 0-2 në 2-2. Cherries shënojnë me Tavernier dhe Evanilson, por Sarr dhe Son evitojnë disfatën për ekipin e Postecoglou.
Chelsea - Leicester 1-0
Fitorja e dytë radhazi në kampionat për Chelsea, që triumfon minimalisht 1-0 ndaj Leicester. Blutë e Londrës e nisin ndeshjen me ritëm të lartë, duke krijuar disa raste për të kaluar në avantazh. Pas më shumë se një çerek ore, vendasit fitojnë një penallti në minutën e 22', por Cole Palmer nuk arrin të mposhtë Hermansen. Pavarësisht gabimit, skuadra e Marescas vazhdon të këmbëngulë dhe Nkunku iu afrohet golit para fundit të pjesës së parë.
Në fraksionin e dytë, Chelsea rrit presionin dhe më në fund e zhbllokon takimin në minutën e 60': Enzo Fernandez shërben për Cucurella në të majtë, i cili godet fort dhe saktë, duke dërguar topin në rrjetë. Skuadra e Van Nistelrooy nuk arrin të reagojë, ndërsa Chelsea siguron tre pikët pa shumë probleme. Me këtë fitore 1-0, Blutë ngjiten në kuotën e 49 pikëve, duke kaluar Manchester City në vendin e katërt. Leicester mbetet në vendin e parafundit me 17 pikë, po aq sa Ipswich.
Tottenham - Bournemouth 2-2
Tottenham shmang humbjen duke rikuperuar nga 0-2 në 2-2 ndaj Bournemouth. Miqtë e nisin më mirë ndeshjen, por me kalimin e minutave Spurs fillojnë të fitojnë terren dhe të marrin kontrollin. Skuadra e Postecoglou krijon disa raste për të kaluar në avantazh, por në momentin e tyre më të mirë ndëshkohen në kundërsulm: në minutën e 42-të, Tavernier përfiton nga një aksion i shpejtë dhe realizon pas asistit të Kerkezit.
Lexo më tej: Arsenal humb terren, Liverpool shkëputet +13: Haaland ekzalton Guardiolën
Në pjesën e dytë, skuadra e Iraola gjen përsëri rrugën e rrjetës me Kluivert, por pas rishikimit në VAR goli anulohet. Holandezi bëhet përsëri protagonist në minutën e 65', kur asiston Evanilson për golin e dytë të Bournemouth, kësaj radhe të vlefshëm. Reagimi i Spurs vjen shpejt, me Sarr që shënon një supergol nga distanca pas vetëm dy minutash, duke ndezur fundin e ndeshjes. Cherries janë afër golit të tretë, me Kluivert që godet shtyllën në minutën e 73', por në minutën e 84' shfaqet episodi vendimtar për Tottenham: penallti e realizuar nga Heung-min Son për barazimin 2-2. Me këtë rezultat, Bournemouth ngjitet në 44 pikë dhe mbetet në garë për një vend në Evropë, ndërsa Tottenham ka 10 pikë më pak.
