Një vatër e re zjarri është aktivizuar në zonën e Mallakastrës, ndërsa flakët janë përhapur me shpejtësi në drejtim të fshatit Drenije, pjesë e Bashkisë Patos.
Situata paraqitet e rënduar, pasi zjarri ka dalë jashtë kontrollit. Flakët kanë përfshirë sipërfaqe të mëdha me masive të mbjella me pisha, ndërsa era e fortë që po fryn në grykat dhe kodrat e zonës po favorizon përhapjen e zjarrit.
Raportohet se flakët kanë kaluar edhe rrugën e Panahorit, duke vijuar përhapjen në terrenin e vështirë të zonës. Pavarësisht ndërhyrjes së forcave zjarrfikëse, banorëve të zonës dhe forcave të ushtrisë, ende nuk është arritur të vihet nën kontroll situata.
Deri në këto momente nuk raportohet rrezik i drejtpërdrejtë për banesat apo banorët, por situata mbetet shqetësuese për shkak të përhapjes së shpejtë të zjarrit dhe kushteve të vështira atmosferike.
