Deklarata e kandidatit Fegja Dimoviq ka nxitur vëmendje pas vizitës së delegacionit të Listës Studentore në Kosovë.
Lëvizja që fitoi zgjedhjet parlamentare në Serbi e konsideron Kosovën pjesë të territorit serb, ndërsa premton mbështetje për komunitetin serb dhe Kishën Ortodokse.
Kandidati i Listës Studentore në Serbi, Fegja Dimoviq, ka deklaruar se Kosova është pjesë përbërëse e Serbisë, duke përsëritur qëndrimin politik të kësaj liste lidhur me statusin e Kosovës.
Deklarata e tij vjen pas një vizite që një delegacion i lëvizjes studentore zhvilloi në Kosovë më 7 dhe 8 nëntor.
Në një reagim publik, Dimoviq theksoi se Kosova zë një vend të rëndësishëm në programin politik të Listës Studentore, duke e cilësuar atë si pjesë të identitetit shpirtëror dhe kulturor serb.
Pas vizitës, ai publikoi një mesazh në Facebook, ku tha se delegacioni kthehej me vendosmërinë për të luftuar krimin e organizuar në Serbi dhe për të mbështetur serbët që jetojnë në Kosovë.
“Bashkëkombësve tanë në Kosovë u përcjellim një mesazh dashurie dhe solidariteti, me premtimin e qartë se nuk do t’i harrojmë kurrë”, shkroi Dimoviq.
Delegacioni përbëhej nga gjashtë kandidatë dhe përfaqësues të lëvizjes studentore, ndër ta Fegja Dimoviq, Millena Petroviq, Emillija Markoviq, Jugosllav Gashiq dhe Nemanja Karoviq.
Gjatë qëndrimit në Kosovë, ata zhvilluan takim me mitropolitin e Rashkës dhe Prizrenit, Teodosije, në Manastirin e Graçanicës.
Takimi u përqendrua në gjendjen e komunitetit serb në Kosovë dhe sfidat me të cilat përballet Kisha Ortodokse Serbe.
Përfaqësuesit e Listës Studentore shprehën gatishmërinë që, në rast të angazhimit të tyre në institucionet shtetërore, t’i kushtojnë vëmendje mbrojtjes së të drejtave të serbëve dhe objekteve fetare ortodokse në Kosovë.
Sipas Radio Evropa e Lirë, delegacioni nuk zhvilloi takime me përfaqësuesit politikë të serbëve të Kosovës gjatë kësaj vizite.
Një tjetër zhvillim që ka tërhequr vëmendjen është qëndrimi i kandidatit nga Kosova, Jugosllav Gashiq, i cili më 7 nëntor deklaroi se Lista Studentore nuk do të bashkëpunojë me Listën Serbe.
Gashiq e bëri këtë parti përgjegjëse për përkeqësimin e pozitës së komunitetit serb në Kosovë.
Lista Serbe është forca kryesore politike e serbëve në Kosovë dhe ka mbështetjen politike të Partisë Përparimtare Serbe, të udhëhequr nga presidenti serb Aleksandar Vuçiq.
Ajo mban nëntë nga dhjetë ulëset e rezervuara për komunitetin serb në Kuvendin e Kosovës dhe udhëheq komunat me shumicë serbe.
Vizita në Kosovë vjen pas fitores së Listës Studentore në zgjedhjet parlamentare në Serbi, më 25 tetor, rezultat që shënoi fundin e sundimit 14-vjeçar të Aleksandar Vuçiqit, sipas raportimit të Radio Evropa e Lirë.
Lëvizja pritet të formojë e vetme Qeverinë e re të Serbisë, por ende nuk ka bërë të ditur emrin e kandidatit për kryeministër dhe nuk ka prezantuar një program të plotë qeverisës.
Qëndrimi i saj ndaj Kosovës pritet të jetë një nga çështjet më të rëndësishme në politikën e jashtme të qeverisë së ardhshme serbe./ REL
