Amy Schumer dhe shefi i kuzhinës Chris Fischer kanë finalizuar zyrtarisht divorcin, rreth 10 muaj pasi njoftuan se do t’i jepnin fund martesës së tyre pas shtatë vitesh së bashku.
Sipas raportimeve të Page Six, ish-bashkëshortët kanë përfunduar procedurat ligjore në Gjykatën Supreme të Nju Jorkut. Çështja rezulton e mbyllur në regjistrat gjyqësorë, ndërsa data e saktë e finalizimit të divorcit nuk është bërë plotësisht e qartë, pasi dokumentet e divorcit në Nju Jork janë konfidenciale.
Çifti kishte dorëzuar më herët dokumentet e propozuara për vendimin e divorcit, së bashku me urdhrat që lidhen me mbështetjen financiare për djalin e tyre 7-vjeçar, Gene.
Amy Schumer, 45 vjeçe, dhe Chris Fischer, 46 vjeç, u martuan në shkurt të vitit 2018, në një ceremoni private në Malibu të Kalifornisë. Një vit më vonë, në maj të vitit 2019, ata u bënë prindër të djalit të tyre, Gene.
Në dhjetor të vitit 2025, komediania njoftoi publikisht ndarjen përmes një postimi në Instagram, ku theksoi se vendimi ishte marrë me vështirësi, por se mes tyre vazhdonin të ekzistonin dashuria dhe respekti.
Ajo bëri të qartë se, pavarësisht përfundimit të martesës, të dy do të vazhdonin të përqendroheshin te rritja e djalit të tyre dhe kërkoi që publiku të respektonte privatësinë e familjes.
Pas lajmit për ndarjen, në media dhe rrjetet sociale qarkulluan spekulime lidhur me arsyet që çuan çiftin drejt divorcit.
Schumer reagoi ndaj aludimeve se ndryshimet në peshën e saj kishin ndikuar në marrëdhënien me Fischer, duke i mohuar ato. Ajo theksoi gjithashtu se ndarja do të bëhej në mënyrë miqësore, me dashuri dhe respekt të ndërsjellë.
