Bayern Munich mposhti Borussia Dortmund me rezultatin 2-1, heshti “Murin e Verdhë” në “Signal Iduna Park” dhe u shpall fitues i Superkupës së Gjermanisë. Nathaniel Brown dhe Michael Olise shënuan golat për bavarezët në këtë përballje të së shtunës (22), ndërsa Fábio Silva ngushtoi diferencën për BVB-në në pjesën e dytë. Me këtë triumf, Bayern Munich e çon në 12 numrin e trofeve të Superkupës së Gjermanisë. Borussia Dortmund, që renditet e dyta për numrin e trofeve të fituara në këtë kompeticion, mbetet me gjashtë tituj.
Bavarezët e kontrolluan plotësisht pjesën e parë, duke pasur rreth 70% të zotërimit të topit dhe një epërsi të theksuar në goditje, 11-0. Dominimi i Bayern u konkretizua në minutën e 28'. Nathaniel Brown mori topin pas pasimit të Michael Olise dhe arriti të mposhtë Kobel, duke i dhënë avantazhin skuadrës mike. Dortmund pati një tentativë për të reaguar dhe e dërgoi topin në rrjetë me Bensebainin, por goli u anulua për pozicion jashtë loje. Kur dukej se pjesa e parë do të mbyllej me avantazhin minimal të Bayern, mbrojtja e Dortmund humbi përqendrimin në minutat shtesë. Olise përfitoi, u nis drejt portës dhe e mposhti portierin, duke dyfishuar avantazhin e bavarezëve.
Borussia Dortmund u shfaq krejtësisht ndryshe pas pushimit. Vendasit rritën intensitetin, nisën të afroheshin më shpesh pranë zonës së Bayern dhe krijuan disa mundësi të qarta për gol. Përpjekjet e tyre u shpërblyen në minutën e 29' të pjesës së dytë. Pas një aksioni të ndërtuar bukur me pasime të shpejta, Fábio Silva arriti të shënojë dhe të rikthejë Dortmundin në lojë. Goli i dha jetë sfidës dhe krijoi pritshmëri për një përmbysje të mundshme, por rikthimi i BVB-së zgjati vetëm pak. Situata u komplikua edhe më tej kur Ramy Bensebaini u ndëshkua me karton të kuq direkt, duke e lënë Dortmundin me dhjetë lojtarë. Me epërsinë numerike dhe avantazhin në rezultat, Bayern Munich administroi minutat e mbetura dhe ruajti fitoren deri në fund. Kështu, bavarezët e nisën sezonin me një trofe dhe me një sukses të rëndësishëm ndaj rivalit të madh. Në krahun tjetër, Borussia Dortmund duhet të kënaqet me paraqitjen e përmirësuar në pjesën e dytë, por pa arritur të përmbysë dominimin e Bayern dhe të rikthejë Superkupën në “Signal Iduna Park”.
