Vëllai i Ariana Grandes, Frankie Grande, ka reaguar publikisht pas njoftimit se këngëtarja planifikon të bëjë një pauzë nga jeta publike pas përfundimit të turneut të saj “Eternal Sunshine”.
Përmes një postimi në Instagram, Frankie ndau një video nga koncerti i Arianës në Çikago, ku ajo interpretonte hitin e vitit 2014 “One Last Time”, dhe i dedikoi motrës një mesazh emocional.
“Familje përgjithmonë. Do të jem pranë teje deri në fund të kohës. Jam shumë krenar për ty dhe shumë i lumtur për ty”, shkroi ai.
Frankie e cilësoi koncertin si një “festë të bukur të artit të saj” dhe shtoi se ishte i lumtur që pati mundësinë ta shihte Ariana-n të shkëlqente në skenë edhe një herë. Në video ai shihet duke e ndjekur performancën me admirim, ndërsa pranë tij ishte edhe nëna e tyre, Joan Grande.
Ariana Grande përfundoi javën e kaluar pjesën amerikane të turneut të saj, ndërsa koncerti i fundit u mbajt në Çikago. Pas shfaqjes, këngëtarja falënderoi fansat me një mesazh prekës në Instagram, ku u shpreh se muajt e fundit kanë qenë “të veçantë, të bukur dhe thellësisht përmbushës”.
Megjithatë, artistja nuk po i jep fund ende turneut. Ajo do të rikthehet në skenë më 15 gusht në Londër, ku do të mbajë disa koncerte në O2 Arena deri më 1 shtator.
Sipas përfaqësuesit të saj, Ariana planifikon të tërhiqet përkohësisht nga aktivitetet publike pas përfundimit të turneut, për t’u fokusuar te mirëqenia e saj.
“Ajo mezi pret ta mbyllë turneun në mënyrë të shëndetshme dhe të lumtur, dhe më pas të marrë një pushim të merituar nga puna dhe paraqitjet publike, të cilat kanë sjellë një vëmendje dhe gjykim të vazhdueshëm ndaj saj”, deklaroi zëdhënësi për revistën People.
Burime pranë këngëtares thanë se Ariana ka qenë e mbingarkuar me angazhime dhe se komentet e vazhdueshme për peshën e saj kanë ndikuar negativisht. Gjithashtu, ajo është larguar edhe nga projekti teatror “Sunday in the Park with George”, i planifikuar të vihet në skenë në Londër në vitin 2027.
