Juventus u ndal në transfertë nga Cagliari, në një ndeshje që në fund rezervoi edhe një moment tensioni mes teknikëve Spalletti dhe Pisacane, të cilët u përjashtuan nga arbitri. Por, duke parë atë që ndodhi në fushë, pati edhe nga ata që morën kritika për paraqitjen në barazimin 1-1, një rezultat që i gëzon sardët, të cilët mbeten në vendin e katërt të renditjes, por disi më pak bardhezinjtë. Në studion e emisionit La Domenica Sportiva, Lele Adani ishte veçanërisht i ashpër me Edon Zhegrovën, i cili u aktivizua në fillim të pjesës së dytë në vend të portugezit Conceição. Sipas tij, futbollisti nuk është i përshtatshëm për ambiciet e Juventusit dhe nuk është i prerë për të pasur një rol titullari në këtë skuadër. Gjatë këtij sezoni, ai ka shënuar vetëm dy gola kundër Sassuolos dhe nuk e ka nisur asnjëherë një ndeshje si titullar.
Adani kritikon Zhegrovën te Juventusi
Pjesa e dytë e zhvilluar nga sulmuesi kosovar kundër Cagliarit nuk ishte negative, por, në përfundim të analizës së tij, Adani mendon se kjo nuk mjafton për të nxjerrë nga vështirësitë një Juventus që ende nuk po gjen ritmin e duhur. Ish-futbollisti e nis diskutimin nga merkatoja dhe afrimet që, sipas tij, nuk janë të përshtatshme për projektin e Spallettit, siç është vënë re që në javët e para të këtij kampionati. Më pas, vëmendja përqendrohet te Zhegrova: “Sot futbolli është fluid dhe nuk është gabim të kesh më shumë ide, por problemi është të kesh kufizime. Zhegrova nuk është një lojtar i nivelit të Juventusit, nuk ka asgjë të përbashkët me këtë nivel: është një lojtar për gjysmë ore, te Juventusi nuk mund të ketë futbollistë të tillë”.
Adani nuk është bindur nga pjesa e dytë e luajtur prej sulmuesit dhe nuk e konsideron atë të përshtatshëm për ambiciet që bardhezinjtë duan të ndjekin këtë sezon: “Nevojiten lojtarë të gatshëm për të qenë titullarë, jo futbollistë për tridhjetë minuta. Zhegrova është një lojtar i përshtatshëm për vendin e gjashtë, por hapin përpara e bën kur një futbollist si ai të luan tri ndeshje radhazi”.
Kosovari nuk është problemi i vetëm në sulmin e Juventusit, ku deri tani askush nuk po arrin të spikasë. Kolo Muani shënoi golin e barazimit kundër Cagliarit, por ky ishte një nga të paktët momente të spikatura në një sezon që ka ngritur tashmë kambanat e alarmit për bardhezinjtë.
