Dan Burn është shembulli perfekt që tregon se nuk është kurrë vonë për të marrë një thirrje në kombëtare. Mbrojtësi i Newcastle, i cili në maj do të mbushë 33 vjeç, është ftuar për herë të parë në karrierën e tij me kombëtaren e Anglisë nga trajneri Thomas Tuchel. Një histori unike për këtë lojtar, të cilit i mungon një gisht, si pasojë e një aksidenti që ka ndodhur në moshë të vogël.
Dan Burn, ftesa e parë në kombëtare gati në moshën 33-vjeçare
Mbetet për t’u imagjinuar se çfarë ka ndjerë Dan Burn kur, pas një karriere të ndërtuar hap pas hapi, mori ftesën për të veshur fanellën e “Tre Luanëve”. Nga Darlington te Fulham, Yeovil Town, Birmingham, Wigan, Brighton dhe në fund Newcastle, ai ka qenë gjithmonë një mbrojtës i fuqishëm, që garanton siguri në prapavijë. Trajneri Thomas Tuchel foli për vendimin e tij për ta përfshirë në skuadrën angleze: “Ka pasur një karrierë vërtet mbresëlënëse dhe është një lojtar shumë i qëndrueshëm”.
Pse Dan Burn i mungon një gisht në dorë
Burn nuk e ka gishtin e katërt (unazorin) në dorën e djathtë, pas një aksidenti që pësoi në moshën 13-vjeçare. Gjatë një tentative për të kapërcyer një gardh, ai mbante një unazë në gisht, e cila mbeti e kapur në një gozhdë. Për fat të keq, kjo çoi në një prerje të pastër të gishtit. Një histori e trishtë për të cilën Burn nuk ka folur kurrë publikisht.
Megjithatë, vitet kanë kaluar dhe ai e ka pranuar këtë ngjarje si pjesë të jetës së tij. Madje, në vitin 2024, gjatë një vizite para-sezonale në selinë qendrore të Adidas, ai dhe shokët e tij të ekipit bënë shaka për gishtin e munguar. Të gjithë lojtarët u detyruan të mbanin doreza për të prekur produktet, por hapësira bosh në dorën e Burn shkaktoi të qeshura mes futbollistëve të Newcastle. Sot, megjithatë, ai ka një arsye edhe më të madhe për të buzëqeshur: ftesa në kombëtare, një moment kulmor në karrierën e tij.
