Tre adoleshentë, 16 vjeç, kanë mbetur të plagosur me thikë pas një konflikti në Krumë të Hasit.
Ngjarja ndodhi vetëm 13 metra larg portës së gjimnazit “Skënderbeu”, ku të rinjtë janë nxënës. Dy prej të plagosurve janë dërguar në Prizren për trajtim mjekësor më të specializuar, ndërsa Policia ka shoqëruar dy bashkëmoshatarë të tyre lidhur me ngjarjen.
Sipas informacionit paraprak të Policisë, konflikti ndodhi rreth orës 13:35 të datës 23 tetor, në rrugën “Lidhja e Prizrenit”. I dyshuar për plagosjen është një 16-vjeçar me inicialet A. G., i cili dyshohet se ka goditur me mjet prerës tre të miturit.
Sipas dëshmitarëve, sherri ka nisur pas një kontakti me parakrah mes të rinjve, për t’u përshkallëzuar fillimisht në përplasje fizike dhe më pas në përdorimin e thikës.
Tre të plagosurit janë transportuar fillimisht në Spitalin Rajonal të Kukësit. Për shkak të nevojës për trajtim më të specializuar, dy prej tyre janë dërguar në Prizren. Për momentin, nuk ka informacion zyrtar mbi gjendjen e tyre shëndetësore.
Pas ngjarjes, Policia ka kapur dhe shoqëruar 16-vjeçarin e dyshuar për plagosjen, si dhe një tjetër 16-vjeçar, i dyshuar si përkrahës i tij. Gjatë veprimeve hetimore është sekuestruar edhe mjeti prerës që dyshohet se është përdorur në konflikt.
Grupi hetimor, nën drejtimin e Prokurorisë, vijon punën për zbardhjen e plotë të rrethanave të ngjarjes.
