Çmimet American Music Awards (AMA) rikthehen për edicionin e tyre të 52-të, me një mbrëmje të mbushur me muzikë, performanca dhe emrat më të mëdhenj të industrisë.
Ceremonia, e konsideruar si spektakli më i madh muzikor i votuar ekskluzivisht nga fansat, do të transmetohet drejtpërdrejt në CBS dhe Paramount+ më 25 maj, në MGM Grand Garden Arena në Las Vegas.
Queen Latifah rikthehet si prezantuese pas më shumë se 30 vitesh
Këtë vit, prezantimin e eventit do ta bëjë Queen Latifah, e cila rikthehet në skenën e AMA-ve më shumë se tre dekada pasi bashkëprezantoi ceremoninë në vitin 1995.
“Jam shumë e emocionuar që rikthehem në skenën e American Music Awards si prezantuese këtë vit. Ka qenë një vit i jashtëzakonshëm për muzikën dhe nuk ka vend më të mirë për ta festuar sesa Las Vegasi”, deklaroi fituesja e Grammy-t.
Taylor Swift kryeson me 8 nominime
Taylor Swift është artistja me më shumë nominime këtë vit – plot tetë. Ajo konkurron në kategori të rëndësishme si “Artistja e Vitit”, “Albumi i Vitit” me albumin The Life of a Showgirl dhe “Kënga e Vitit” me The Fate of Ophelia.
Megjithatë, pavarësisht dominimit në nominime, Swift nuk do të jetë e pranishme në ceremoni. Pas saj renditen Sabrina Carpenter dhe Morgan Wallen me nga shtatë nominime secili.
BTS rikthehet pas katër vitesh
Organizatorët kanë premtuar një listë të fuqishme performancash. Në skenë do të ngjiten emra si Teddy Swims, Keith Urban dhe Twenty One Pilots.
Një nga momentet më të shumëpritura pritet të jetë rikthimi i BTS në një ceremoni çmimesh pas katër vitesh mungesë.
Në performanca do të marrin pjesë gjithashtu Karol G, Billy Idol, New Kids on the Block dhe The Pussycat Dolls.
Çmime speciale për Billy Idol, Karol G dhe Darius Rucker
Mbrëmja do të sjellë edhe disa nderime speciale.
Billy Idol do të marrë çmimin Lifetime Achievement Award për kontributin e tij në muzikën rock.
Ndërkohë, Karol G do të nderohet me International Artist Award of Excellence, si vlerësim për ndikimin e saj muzikor dhe kulturor në mbarë botën.
Ndërsa Darius Rucker do të marrë çmimin Veterans Voice Award për mbështetjen e vazhdueshme ndaj veteranëve dhe organizatave ushtarake.
