Aktori dhe komediani britanik Russell Brand është shpallur fajtor për përdhunim dhe sulm seksual, pas një gjyqi katërjavor në Londër, lidhur me akuza të ngritura nga disa gra për ngjarje që datojnë më shumë se dy dekada më parë.
51-vjeçari u shpall fajtor për një akuzë përdhunimi dhe tri akuza për sulm seksual, që përfshijnë katër gra. Megjithatë, juria e shpalli të pafajshëm për dy akuza të tjera përdhunimi dhe një akuzë për tentativë sulmi të pahijshëm.
Brand i ka mohuar vazhdimisht akuzat, duke dëshmuar gjatë procesit se, megjithëse në rininë e tij kishte pasur një jetë seksuale të shthurur, nuk kishte detyruar asnjë grua të kryente marrëdhënie pa dëshirën e saj.
Pas shpalljes së vendimit, gjykatësi Joel Bennathan bëri të ditur se aktori përballet me një dënim të konsiderueshëm me burg. Ai u dërgua në paraburgim, pasi gjykata refuzoi kërkesën për lirimin e tij me kusht.
Vendimi përfundimtar mbi dënimin pritet të jepet të hënën, më 9 nëntor.
Çështja ndaj Brand përfshinte akuza nga gjashtë gra dhe lidhej me ngjarje të ndodhura mes viteve 1999 dhe 2009. Prokuroria e përshkroi atë si një person manipulues, i cili kishte shfrytëzuar famën dhe ndikimin e tij për të abuzuar seksualisht me gra.
Russell Brand, i njohur për rolet në filmat Get Him to the Greek dhe Forgetting Sarah Marshall, u bë fillimisht objekt i akuzave publike në vitin 2023, pas një investigimi të publikuar nga mediat britanike. Që atëherë, hetimet vijuan deri në ngritjen e akuzave penale ndaj tij.
