Deputetja e Partisë Demokratike, Jorida Tabaku, ka shpërndarë një video nga lirimi i studentëve dhe të miturve të arrestuar gjatë protestës studentore, duke i cilësuar ata si heronjtë e Shqipërisë së shumicës që kërkon ndryshim.
Tabaku ka qenë e pranishme në Bllokun e Sigurisë përgjatë këtyre ditëve, ku ka takuar të rinjtë e ndaluar dhe familjarët e tyre. Edhe sot, ajo ishte aty kur një pjesë e të rinjve dolën, ndërsa të tjerë po lirohen pas vendimeve të gjykatës.
Në mesazhin e saj, deputetja e përshkruan protestën si më të jashtëzakonshmen që ka parë, ndërsa denoncon ndalimin dhe mbajtjen në qeli të të miturve, mes tyre edhe 14–15-vjeçarë. Sipas saj, këta të rinj janë arrestuar vetëm sepse kanë guxuar të protestojnë, pa kryer asnjë veprim tjetër përveç pranisë së tyre.
“Kjo është protesta më e jashtëzakonshme që unë kam parë. Një protestë e heronjve, që shpeshherë janë edhe fare të vegjël, 14–15 vjeç, të shoqëruar, të arrestuar këtu, që kanë kaluar netët në qeli vetëm sepse kanë guxuar të protestojnë”, shprehet Tabaku.
Deputetja thekson se kërkesat e të rinjve lidhen me nevojat e të gjithë shoqërisë: arsim dhe shëndetësi më të mirë, një ekonomi që mbështet familjet dhe pensione më të larta për gjyshërit.
Sipas saj, guximi i të rinjve dhe prania e tyre në rrugët e Tiranës janë arsye për të besuar te një Shqipëri më e mirë. Tabaku i cilëson ata si ndërgjegjen e një shoqërie që, sipas saj, është ndrydhur dhe ka vuajtur për 14 vite, ndërsa sot po shprehet përmes zërit të tyre.
“Ata janë sot ndërgjegjja e një shoqërie që për 14 vite është ndrydhur, për 14 vite ka vuajtur, ndërkohë që sot flet me zërin e tyre, me zërin e të rinjve që padrejtësisht janë arrestuar”, përfundon Tabaku.
