Tre protestues janë arrestuar në Shkup gjatë protestës për përdorimin e gjuhës shqipe në shkolla. Mësohet se ata janë studentë që janë arrestuar nga autoritetet vendase, për arsye ende të panjohura.
Në fjalën e mbajtur, organizatori i protestës Mevlan Ademi theksoi se “jemi për barazi dhe respekt”, dhe të gjithë bashkë do të kërkojmë të drejtat tona.
“Ky zë nuk ndalet, kalon brez pas brezi. Çohu shqiptar për gjuhën tonë”, tha ai.
Një tjetër student i bëri thirrje ministrit të Drejtësisë të japë dorëheqjen, duke theksuar se "shqiptarët nuk do të lodhen së kërkuari të drejtat e tyre".
Po ashtu një apel ata ia drejtuan edhe kryeministrit Mickovski, që të tregojë se zgjidhja vjen me dialog, dhe kjo çështje duhet të bashkojë gjithë partitë. "Sa më shumë të injorohet zëri i studentëve, do të rritet revolta. Ne rebelohemi kur na mohohet e drejta", shprehen studentët.
Kjo është protesta e dytë në Shkup e organizuar nga studentët shqiptarë që kërkojnë që të zhvillojnë provimin e Jurisprudencës në gjuhën shqip.
