Kryetari i Partisë Demokratike, Sali Berisha ka bërë akuza të reja ndaj kreut të SPAK, Altin Dumani, pak para se të paraqitej në Prokurorinë e Posaçme në kuadër të masës së sigurisë “detyrim paraqitje”.
Duke folur për mediat jashtë ambienteve të SPAK, Berisha paralajmëroi publikimin e një tjetër denoncimi ndaj Dumanit, pas akuzave të mëparshme për deklarimin e pasurive me vlera më të ulëta se ato të tregut.
Sipas Berishës, kreu i SPAK banon në një vilë që, sipas tij, është deklaruar si e ndërtuar para martesës së Dumanit, me qëllim shmangien e lidhjes së pasurisë me të. Ai pretendoi se gjatë procesit të vettingut, prindërit e bashkëshortes së Dumanit kanë deklaruar përmes një akti noterial se fondet për ndërtimin e vilës ishin siguruar nga një misionar i huaj.
Berisha vuri në dyshim këtë deklarim, duke e cilësuar si “mashtrim”, ndërsa shtoi se në dokumente thuhet se Dumani nuk ka pasur kontribut financiar në ndërtimin e banesës.
Lideri demokrat deklaroi gjithashtu se, sipas dokumenteve shtetërore që ai disponon, vila figuron e ndërtuar në vitin 2000 dhe se është banuar prej vitesh nga familja e bashkëshortes së kreut të SPAK.
