Te Real Madrid këtë vit nuk mungojnë dramat. Nuk mjaftojnë intrigat taktike dhe sfidat në fushë: ambientin po e trazojnë polemikat dhe konfliktet mes lojtarëve. Tani është radha e Eder Militao dhe Vinicius Jr, bashkë me influenceren e famshme Virginia Fonseca. Mes “story”-ve në Instagram, sherreve dhe polemikave, tensioni në dhomën e zhveshjes së “Los Blancos” është në kulm, ndërsa zërat për ardhjen e portugezit Jose Mourinho shtojnë edhe më shumë zjarrin.
Festat dhe ndarja: Virginia lë Vinicius
Gjithçka nisi me një “story” në Instagram të Virginia Fonseca, ku njoftonte fundin e lidhjes me Vinicius Jr. Ndarja surprizoi shumëkënd, pasi një natë më parë ajo ishte parë në tribunat e stadiumit “Bernabeu” gjatë ndeshjes Real Madrid-Real Oviedo. Situata shpërtheu kur disa media braziliane sugjeruan se pas ndarjes fshihej një festë e organizuar nga Eder Militao, ku kishin marrë pjesë edhe disa eskorta braziliane.
Reagon Militao
Militao reagoi menjëherë. I zemëruar nga akuzat, mbrojtësi i Real Madrid publikoi një postim në Instagram: “Në lidhje me spekulimet dhe akuzat që po qarkullojnë online ndaj meje, dua të sqaroj se të gjitha informacionet që më atribuohen janë të rreme dhe të pabazuara”. Ai shtoi se është i fokusuar te rikuperimi nga dëmtimi dhe te familja e tij, me bashkëshorten shtatzënë që mbetet prioritet absolut.
Një Real i dominuar nga rrjetet sociale
Në epokën e rrjeteve sociale, jeta private e futbollistëve është gjithmonë nën reflektorë. Situata mori përmasa publike dhe Militao pranoi se kjo po ndikon shumë në jetën e tij: “Kam arritur deri aty sa praktikisht nuk dal nga shtëpia kur bashkëshortja ime nuk është aty, pikërisht për shkak të ndikimit dhe përmasës që kanë marrë këto akuza të pabaza”. Mbrojtësi e mbylli mesazhin duke kërkuar prova reale dhe jo supozime apo gjykime të nxituara.
Mbappé dhe thumbat ndaj teknikut Arbeloa
Ndërkohë, edhe Mbappé nuk qëndroi në heshtje, duke hedhur thumbime ndaj trajnerit Arbeloa pa kursyer asgjë. Francezi nuk është nga ata që i mbajnë gjërat për vete dhe, ndërsa zërat për mbërritjen e Special One intensifikohen, duket gati të luajë rolin e tij në kaosin madrilen.
Çfarë pritet në të ardhmen?
Me hijen e portugezit Mourinho që mund të bjerë shumë shpejt mbi “Santiago Bernabeu”, klima po bëhet gjithnjë e më e nxehtë. “Special One” njihet për aftësinë për t’i kthyer vështirësitë në suksese, por a do të arrijë të menaxhojë personalitetet e forta dhe dramat jashtë fushe? Për momentin, e vetmja siguri është se nga Real Madrid mund të pritet gjithçka, brenda dhe jashtë fushës së blertë. Të gjithë sytë janë drejt Madridit, tashmë një fuçi baruti.
