Detaje të reja kanë dalë pas arrestimit të shefit të Komisariatit të Sarandës, Gëzim Bashllari në kuadër të hetimeve për lejimin e ndërtimeve pa leje në zonën bregdetare.
Sipas burimeve, gjatë marrjes në pyetje nga oficerët e Agjencisë së Mbikëqyrjes Policore, Bashllari është shprehur se ditët e fundit kishte qenë i angazhuar me hetimin e vrasjes së pronarit të një karburanti në Sarandë dhe për këtë arsye nuk kishte pasur mundësi të merrej me rastet e ndërtimeve të paligjshme. AMP e akuzon atë, së bashku me disa efektivë të tjerë të komisariatit, për shpërdorim detyre dhe mosveprim ndaj ndërtimeve pa leje në Sarandë dhe Ksamil.
Në pranga kanë rënë gjithashtu një oficer krimesh dhe një specialist zone, ndërsa hetimet vijojnë edhe për punonjës të tjerë policie që dyshohet se kanë favorizuar ose kanë toleruar ndërtimet e paligjshme. Pak ditë më parë, autoritetet arrestuan edhe tetë punëtorë ndërtimi që po ngrinin një strukturë pa leje në det, ndërsa pronarja e objektit u shpall në kërkim.
