Presidenti i SHBA-së, Donald Trump, deklaroi se Uashingtoni kishte lejuar tre anije cisternë kinezë që transportonin naftë iraniane të kalonin nëpër Ngushticën e Hormuzit në fillim të kësaj jave. Komentet u bënë gjatë një interviste për Fox News, pas kthimit të Trump nga vizita në Kinë dhe takimi me presidentin kinez Xi Jinping.
Trump tha se anijet kishin kaluar në rrugën strategjike “sepse ne e lejuam”, duke shtuar se kalimi kishte ndodhur para udhëtimit të tij. Ai nuk dha detaje të mëtejshme mbi vendimin dhe as nëse kishte ndonjë marrëveshje me Pekinin. Ngushtica e Hormuzit dhe tensionet në rajon
Situata në Ngushticën e Hormuzit mbetet e tensionuar, pasi Irani ka vendosur kufizime për trafikun detar dhe ka kërkuar tarifa tranziti për anijet që kalojnë në këtë zonë. Në përgjigje, Shtetet e Bashkuara kanë bllokuar portet iraniane, duke rritur përplasjet në rajonin e Gjirit Persik. Sipas mediave iraniane, rreth 30 anije – përfshirë të paktën një kineze – kanë kaluar nëpër ngushticë që nga nata e së mërkurës, me Teheranin që pretendon se kalimet janë bërë me lejen e Iranit.
Nuk ka ende konfirmim të pavarur për këto deklarata.
