Sulmet izraelite në Liban u kanë marrë jetën 12 personave, ndërsa lufta midis Izraelit dhe grupit të armatosur libanez Hezbollah vazhdon pavarësisht një armëpushimi. Tetë persona, përfshirë dy fëmijë, vdiqën kur dronët shënjestruan tre automjete në autostradën bregdetare në zonat Barja, Jiyeh dhe Saadiyat, rreth 20 km nga kryeqyteti, sipas ministrisë. Të tjerët u vranë në sulmet ndaj katër makinave më në jug, në qytetin e Sidonit dhe në qytetet Maaliyeh, Chaaitiyeh dhe Naqoura.
BBC shkruan se ushtria izraelite nuk ka komentuar ende ngjarjen, por tha se forcat izraelite goditën infrastrukturën e Hezbollahut në disa zona jugore. Luftëtarët e Hezbollahut lëshuan gjithashtu një numër dronësh që shpërthyen pranë një zone ku trupat izraelite po vepronin në Libanin jugor.
Më shumë se 400 njerëz janë vrarë në të gjithë vendin që kur armëpushimi u njoftua nga Presidenti i SHBA-së Donald Trump pothuajse një muaj më parë. Izraeli ka intensifikuar sulmet ajrore dhe të artilerisë ditët e fundit, veçanërisht në Libanin jugor, duke thënë se po synon luftëtarët dhe infrastrukturën e Hezbollahut.
