Cardi B dhe Stefon Diggs kanë vendosur t’i japin një mundësi të dytë marrëdhënies së tyre, pasi ishin ndarë më herët.
Sipas një burimi për Us Weekly, reperja e njohur e hitit “WAP” po e rikthen gradualisht në jetën e saj ish-lojtarin e NFL-së.
“Ajo po i jep një shans të dytë, por nuk është ende plotësisht e përkushtuar ndaj tij,” ka thënë burimi, duke shtuar se Cardi “po e lejon ngadalë” Diggs të afrohet sërish.
Sipas të njëjtit burim, marrëdhënia mes tyre është përmirësuar kohët e fundit.
“Ata janë në kontakt më të afërt dhe situata nuk është më konfliktuale. Ajo ende ka ndjenja për të, gjë që e bën të vështirë largimin,” është shprehur burimi.
Rikthimi i tyre vjen pasi çifti u pa së bashku në një event në Washington, DC, ku u shfaqën të afërt dhe shkëmbyen përqafime në publik. Në pamje të publikuara online, Diggs shihej duke e puthur Cardi B në faqe dhe duke e mbajtur afër gjatë eventit.
Më herët, fansat kishin vënë re se dyshja nuk ndiqnin më njëri-tjetrin në rrjetet sociale, pas ndarjes së tyre përpara Super Bowl 2026. Sipas raportimeve, Cardi B ishte tërhequr nga marrëdhënia për shkak të mungesës së besimit.
“Ajo është shumë e prerë kur nuk ndjen besim. U tërhoq për t’u fokusuar te fëmijët dhe karriera e saj,” ka thënë një tjetër burim.
Cardi B dhe Stefon Diggs kanë një djalë së bashku, i lindur në nëntor 2025. Reperja ka edhe tre fëmijë të tjerë nga martesa e saj e mëparshme me Offset, ndërsa Diggs është baba i pesë fëmijëve me gra të ndryshme.
